അലക്കി വെളുപ്പിച്ച്
വടിപോലെ തേച്ചിട്ട ഷര്ട്ടുമിട്ട്
നീ മുന്പില് വന്നു നില്ക്കുമ്പോഴെല്ലാം
നിന്റെ നെഞ്ചില് രോമങ്ങള്
നിബിഡവനം തീര്ത്തിരുന്നോ
എന്നു നോക്കിയിരുന്നു എന്നത് ശരിതന്നെ
വെളുപ്പിച്ച ഷര്ട്ടെങ്കിലും
വെളുക്കാത്ത നിന്റെ മനസ് അപാരം
ഇടയ്ക്കിടെ ചുംബിക്കുമ്പോഴും അറിഞ്ഞില്ല
നിന്റെ മനസിലെ കുശുമ്പും കുന്നായ്മയുമുള്ള
സ്ത്രൈണതയെ
ചേര്ത്തു നിര്ത്തുന്ന സമയത്തും
തൊട്ടു മുന്പിലുള്ള മതിലിന്റെ
മറയില് മറ്റൊരുവനോട് ചേര്ന്നു
നില്ക്കുന്നവളുടെ മാറിടത്തിലേക്ക്
നീളുന്ന നിന്റെ കണ്ണുകളുടെ
അനുസരണക്കേടും മനസിലാകാതില്ല
പറയുന്ന വാക്കിലെ
പൊങ്ങച്ചവും തലക്കനവും
മാത്രമേ നിനക്കുള്ളുവെന്ന്
മറ്റാരേക്കാള് നന്നായി അറിയുന്നു
നിന്റെ അടിമയായിരിക്കാന്
ആവശ്യപ്പെതു മൂലം
നിന്നെ നഷ്ടപ്പെടാതിരിക്കാന് മാത്രം
കുഴിച്ചു മൂടിയതാണു സ്വന്തം സ്വത്വം
ഒടുവില് നേരിട്ടു പോലും
പറയാന് ധൈര്യമില്ലാതെ
പിരിഞ്ഞു പോകുമ്പോഴും
ദേഷ്യം തോന്നുന്നില്ല തെല്ലും
കടുകുമണിയോളം
ചെറുതായ നിന്നോട്
ഉച്ചത്തില് സംസാരിക്കാന് പോലും
സഹതാപം തോന്നും
എങ്കിലും കുറച്ചു നാളെങ്കിലും
സ്വത്വത്തെ നിനക്കായി
മാറ്റിവച്ചതിന്റെ നോവുണ്ട് മനസില്
